LAOAG CITY – Inpakaammo ni PCapt. Khristian Lee Badua, acting force commander iti RMFB 101st Maneuver Company nga umabot iti 20 ti nagbalin a benepisyaryo ti 5Ps Project wenno (Pabahay, Pailaw, Patubig, Pantawag, Palikuran) ken Pangkabuhayan ni Manong Pulis iti ili ti Solsona.
Kuna ni Badua a dagiti benepisyaryo ket manipod iti Brgy. Lipay iti nasao nga ili.
Inpakaammo na a maysa ti nakaawat ti Pantawag ken dagiti dadduma ket Pailaw.
Segun ken ni Badua, ti pailaw ket tulong tapno maipaayan ti nalawlawag nga aglawlaw dagiti residente idinto a ti pantawag ket mausar para iti komunikasyon.
Maipalagip a ti 5Ps project ket idadauloan nu PNP Reginal Director Pol. Brigidier Gen. Emmanuel Peralta pakairamanan ni Provincial Director Police Col. Julius Suriben ditoy probinsya.
Kabayatanna, immunan nga inlawlawag ni Badua a malaksid iti pannakibinnulig ti RMFB 101st Maneuver Company iti 5Ps Program ket tumultulong dagitoy iti internal security operations, counter terrorism, anti criminality effort pakairamanan ti pannakaipaay ti seguridad iti masungad nga eleksyon ken panagtalinaed a nalinak ken natalna iti probinsya.
