LAOAG CITY – Maikkan ti 20% a diskwento iti bayad ti pwesto dagiti aglaklako ti non-essential products iti merkado publiko ditoy siudad ti Laoag.
Daytoy ket kalpasan nga inaprubaran ti Sanngunian Panlungsod ti resolusyon nga inyendorsar ni Mayor Michael Marcos Keon pakaseknan iti surcharges ken penalties dagiti agup-upa ti pwesto iti tiendaan.
Immunan a naobserbaran ti lokal a gobierno ditoy siudad ti pannakaapektar iti pandemiya dagiti agup-upa ti pwesto iti tiendaan ken isu ti nangitunda ti panagsardeng ti operasyon dagitoy.
Manamnama a maiyaplikar ti nasao a diskwento intuno Marso agingga iti bulan ti Mayo.
