LAOAG CITY – Mapatta-patta nga umabot iti 20 a milyon a pisos ti mabalin a madadael iti sektor ti agrikultura iti ciudad ti Batac.
Daytoy ti namsaakan ti agtultuloy a pannakalayus dagiti kataltalonan iti nasao a ciudad gapu iti Bagyo Julian.
Segun ken ni Mayor Albert Chua, mapatta-patta nga agbalor iti 19 a milyon pisos ti maperdi a pagay, 200,000 a natnateng ken 50,000 a mais.
Malaksid iti sector ti agrikultura ket inbatad pay ni Chua a naruay dagiti nadadael nga imprastruktura ken nadadael a linya ti kuryente a nangitunda ti pannakapukaw ti kuryente kadagiti sumagmamano a barangay.
Kuna ti Mayor nga adda 28 nga indibidual a nagbakwiten ken mabalin pay a manayunan.
Mainaig iti daytoy inpakaammuna a nakasagan metten dagiti relief goods nga ipaay da.
Kabayatanna, inpakaammu met ni Mayor Chua nga adda natay a maysa a baket nga agtawen ti 87, residente iti Barangay Quiling Norte, iti ciudad ti Batac kalpasan a nalmes daytoy iti kanal nga asideg iti pagtaengan da iti baet ti iduduprak ti Bagyo Julian.
Basar iti inbestigasyon ti City Health Office, agkabawen ti baket ken saan a napupuotan dagiti kabbalay na a rimuar daytoy ken nakita da laengen ti biktima iti kanal nga asideg iti pagtaengan na nga awananen ti biag.
