LAOAG CITY – Nailatang ti 20 a milyon a pisos para iti pannakaestablisar ti farm to market road iti Brgy. Camandingan ken Baoa East iti siudad ti Batac.
Daytoy ket kalpasan a naipasa iti umuna ken maudi a pannakaibasana iti Draft Provincial Resolution No. 2024-05-286 a maysa a resolusion a mangipalubos ken mangiyendorso iti pannakaipatungpal ti Proyekto: Pannakaaramid ti Farm-to-Market Road iti Brgy. Camandingan ken Baoa East iti siudad ti Batac.
Napundoan babaen iti Local Government Support Fund – Other Financial Assistance kadagiti Local Government Units manipod iti Department of the Interior and local goverment nga addaan ti dagup a 20 milyon a pisos.
Segun ken ni Senior Board Member Rafael Medina, ti Chairman ti Committee on Public Works, daytoy a proyekto ket maysa a proposal project ti gobierno probinsial a maikonsiderar a napintas a mapundoan.
Inbatadna a ti pannakaestablisar wenno pannakapalawa ti kalsada dagiti nasao a barangay ket tapno nalaklaka ken nadardaras iti pannakaibiahe dagiti maap-apit a produkto.
Inlawlawagna nga agdagup ti 844 a metro iti paset ti Brgy. Baoa East ken 306 a metro iti Brgy. Camandingan nga adda ti pakabuklan a 1.150 kilometers a kalawa ti matarimaan.
Inpakaammona a dagiti maapektaran iti nasao a proyekto ket iti Brgy. Camandingan, Baoa East, Nagbacalan, Palompong, San Pedro nga addaan ti populasion a 7,328 ken 1,530 a pagtaengan.
Innayonna nga iti agdama a situasion iti nasao a kalsada ket saan a napintas ken nailet.
Kabayatanna, naammoan a manamnama a daytoy ket maaramid iti uneg ti 137 nga aldaw wenno uppat agingga innem a bulan.
