LAOAG CITY – Personal nga inpaay ni Presidente Ferdinand Marcos Jr. ti nasurok 20 a milyon a pisos a tulong pinansial kadagiti mannalon ken mangngalap a naapektaran ti El Niño iti probinsia ti Tawi-Tawi ken Basilan.
Inyawat ni Presidente Marcos ti tseke a sag-10 a milyon a pisos a tulong kada Tawi-Tawi Governor Yshmael Sali ken Basilan Governor Hadjiman Salliman-Hataman idinto dagiti mannalon ken mangngalap ket immawat ti sag-10 a ribu a pisos.
Iti panagbitlana iti panangipaay ti tulong, inbatad ni Presidente Marcos a naipan iti state of calamity ti Bangsamoro Autonomous Region in Muslim Mindanao (BARMM) gapu iti El Niño.
Nasurok-kumurang a 80 a miembro ti House of Representatives iti panangidaulo ni Speaker Ferdinand Martin Romualdez a makikaykaysa met iti Presidente a kagiddan ti Bagong Pilipinas Serbisyo Fair, maysa a programa a mangipapaay ti serbisio ken tulong kadagiti marginalized a komunidad iti intero a pagilian.
Inpadanon ti panagyaman ni Presidente Marcos kadagiti mannalon, mangngalap ken dagiti pamilia iti sakripisioda tapno maipasigurado ti food security iti pagilian.
Nangipaay met ti Department of Social Welfare and Development ti 10 a ribu a pisos iti tunggal maysa kadagiti 10 a ribu a benepisiario a bukbuklen dagiti mannalon, mangngalap ken dagiti pamiliada.
Ti Office of the House Speaker ket nangipaay pay ti lima a kilo ti bagas iti tunggal nagatendar iti programa no sadino ti kangrunaan a nakipaset nga ahensia ti gobierno ket ti Department of Trade and Industry (DTI), Department of Labor and Employment (DOLE), Technical Education and Skills Development Authority (TESDA) ken Department of Agriculture (DA).
