LAOAG CITY – Inbutaktak ni Acting General Manager Perry Martinez iti Ilocos Norte Electric Cooperative nga adda ti 20 manipod iti 90 a member-consumers a naduktalan nga agtaktakaw ti kuryente ti maipagarop a nagbayad ti dakkel a kantidad kadagiti dati nga empleyado ti kooperatiba tapno saan da a makasoan ken maurnus ti amin.
Inlawlawag ni Martinez a naduktalan na daytoy kalpasan nga inrebisar na dagiti listaan dagiti nairekord a nagtakaw ti kuryente a saan pay a nakabayad wenno nakasoan.
Kuna na nga iti pannakisarita da iti 90 nga adda iti listaan ket 20 kadakuada ti nangadmitir a nagbayad da ti 15 a ribo agingga iti 50 ribo a pisos kadagiti dati nga empleado ti Ilocos Norte Electric Cooperative ngem saan a naipakaammo daytoy a banag iti mismo a kooperatiba.
Basar ken ni Martinez a dagiti listaan dagiti maipagarop nga agtaktakaw ti kuryente ket manipod pay 2010.
Mainaig iti daytoy, inrakurak ni Martinez a panunuten na paylaeng no kamaten da dagiti nadakamat a dati nga empleado ti kooperatiba kalpasan ti nagbalin a duktalna.
Immunan a kinumpirmaran ni Martinez nga adda ti nasurok a 100 a nairekord ti kooperatiba a maipagarop nga agtaktakaw ti kuryente kadagiti nagduduma a lugar ditoy probinsia.
