LAOAG CITY – Kinumpirmaran ni Barangay Kagawad Bryan Battulayan iti Barangay 61 citoy ciudad ti Laoag a 20 a pagtaengan ti karaman kadagiti mailockdown iti lugar da iti uneg ti pito nga aldaw.
Daytoy ket kalpasan ti panagpositibo ti maysa a residente a ni IN-C797, agtawen ti 48 a babai, ken maysa daytoy a pastor.
Segun kenni Battulayan, maysa kada pagtaengan ken dagiti nakapulapol ti pasyente ti dumalan iti swab test intono Sabado.
Ummuna iti daytoy, ti pasyente ken dua pay a kabbalay na ket dimmalan iti swab test ngem negatibo ti resulta dagiti dua.
Mainaig iti daytoy, kunana a ti kalsada nga isu ti dalan dagiti residente a sumagmamano a Sitio ket mapalubusan latta a sumalyasat laketdi saan da a karaman kadagiti pagtaengan a nailockdown.
Innnayon na a binalakadan na met ti pamilya ti pasyente a mangipan lattan ti tugaw iti sango ti pagtaengan da tapno idiso da ditoy ti suplay a kasapulan dagitoy.
