LAOAG CITY – Inbatad ti Israeli military nga umabot iti 20 a tattao ti nasugatan iti southern Israel gapo iti drone attack manipud Yemen.
Segun iti Israel Defense Forces (IDF), ti drone ket timmama iti Eilat iti Red Sea coast, ken ginandat da met a lapdan daytoy.
Inlawlawag met ti Magen David Adom emergency medical service a dagiti 20 a nasugatan ket naitaray iti Yoseftal Hospital pakairamanan ditoy ti dua a lallaki a nakaro ti sinagaba da.
Kalpasan daytoy ket inako ti Iranian-backed Houthis ti responsibilidad iti nadakamat a panagatake.
Kuna ti pannakangiwat ti grupo a ni Yahya Sarea, dagiti dua a two drones ket pinuntirya na ti inawagan da nga “Israeli enemy ” ken ibilang na a balligi ti operasyon da.
Kabayatanna, naideploy met ti tropa ti Israel Defense Forces ken Israel Police iti lugar kalpasan a naawat da ti report.
