LAOAG CITY – Naalarma dagiti residente iti sumagmamano a barangay idiay Marcos, Ilocos Norte kalpasan a nauram ti kabanbantayan a sakop iti public cemetary iti nagbaetan iti Barangay Elizabeth ken Barangay Cacafean iti nasao nga ili.
Segun ken ni Barangay Chairman Ancheto Pugyao iti Barangay Cacafean iti ili ti Marcos, umabot ti 20 nga ektarya ti kalawa ti napasamak nga uram.
Nupay kasta, nagyaman ti kapitan gapu ta awan ti nauram a tanem iti nasao a sementaryo.
Inbatad ni Ancheta nga alisto a nagramram iti apoy gapu kadagiti kayo ken ti nabara a panawen.
Innayon na a nangrugi iti uram idi rabii ngem nasebseban met laeng babaen kadagiti nagresponde a bombero ken dagiti residente iti lugar.
Ngem kuna ni Ancheta, itay laeng bigat ket naggil-ayab manen ti apoy isut gapu na a nagreport da a dagus iti Bureau of Fire Protection iti ili ti Marcos.
Iti agdama, agtultuloy iti imbestigasyon dagiti otoridad tapno maamoan no ania ti nangitunda ti napasamak nga uram.
