LAOAG CITY – Nasugatan ti sumurok 20 nga indibidual kalpasan a narpuog ti amusement park ride idiay Saudi Arabia.
Napasamak ti aksidente iti Al-Hada area iti siudad ti Taif no sadinno a kabayatan a nakalugan dagiti maseknan iti 360 Big Pendulum ride ket kellaat a nagudua a nangitunda ti pannakatennagda.
Gapu iti daytoy, napaserraan ti nasao a parke para iti pannakaiwayat ti naun-uneg nga imbestigasion dagiti otoridad.
Mainaig iti daytoy, basar iti statement ti regional government nga inbilin ni Taif Governor Prince Saud bin Nahar bin Saud bin Abdulaziz ti naan-anay nga imbestigasion ken insigida a pannakaiserra ti parke.
Naaammoan a dagiti sumagmamano a nasugatan ket naipaayan ti first aid idinto a dagiti dadduma a biktima ket naitaray iti ospital.
Kabayatanna, adda ti 23 nga indibidual ti nasugatan ken awan ti naipadamag a pimmusay gapu iti aksidente.
