LAOAG CITY – Inpakaammo ni Engr. Shiela Opelac, mangidadaulo ti City Agriculture Office a 20 a porsiento pay laeng dagiti nakaraep a mannalon ditoy siudad ti Laoag gapu iti nakaro nga epekto ti El Niño.
Segun kenkuana, dagitoy a 20 a porsiento ket dagiti mannalon nga adda iti umabagatan a paset ditoy siudad kas iti Barangay Tangid, Barangay Bengcag ken dadduma pay.
Inbatadna nga adu pay dagiti saan pay a nakamula gapu iti kinakurang ti danum nga usaren dagitoy.
Inlawlawagna nga al-alukoyenda dagiti mannalon a no mabalin ket ag-direct seeding-da kadagiti bin-i tapno saan a masayang dagiti imulada.
Innayonna pay a napintas ti panagmula dagiti mannalon kadagiti dadduma nga high value crops kas ti mais, nateng ken dadduma pay.
