LAOAG CITY – Inbatad ni Engr. Ranison Narciso, ti municipal agriculturist iti ili ti Solsona a palso ti agwarwaras a damag maipanggep iti saanen a pannakaili dagiti baboy nga apektado ti African Swine Fever (ASF) iti nasao nga ili.
Daytoy ket partikular kadagiti aggapo iti 500-meter radius manipod iti lugar nga addaan ti kaso ti ASF.
Segun ken ni Narciso saan a pudno ti damag gapu ta adda ti 200 a baboy a naituding a maikali iti sumarsaruno nga aldaw.
Inbatad na a dagitoy ket aggapo iti Brgy. Talugtog, ti barangay nga addaan ti kumpirmado a kaso it ASF.
Kuna na a pakairamanan ditoy dagiti baboy manipod iti 500-meter radius wenno iti Brgy. Juan ken iti Brgy. Laureta iti nasao nga ili.
Mainaig iti daytoy, inbunannag na a manarimaan ti pannakabirok ti lugar a pakaikalyan dagiti baboy.
Innayun na a nu malpas ti culling kadagiti 200 a baboy ket addan ton ti 1,600 a kabuklan ti baboy a naikali iti ili ti Solsona gapu iti ASF.
