LAOAG CITY – Umabot iti 200 a pamilya ti naipaayan ti regalo babaen iti Liga ng mga Barangay Ilocos Norte Chapter.
Segun ken ni Ilocos Norte Liga ng mga Barangay Pres. Ryan John Pascua, karaman kadagiti naipaayan ti regalo ket ti 100 a pamilia manipud iti lima a barangay iti ili ti Pagudpud para iti umuna a distrito idinto a 100 a pamilia met manipud iti Brgy. Nagbacalan ti ili a Paoay para iti maikadua a distrito.
Kagiddan daytoy, impeksana ti panagyamanna iti napintas a panagkaykaysa dagiti kameng ti Liga ng mga Barangay iti babaen ti lideratona.
Impalgakna a mismo a dagiti opisial ti Liga ng mga Barangay-National chapter ti mangdaydayaw iti napintas a panagtitimpuyog dagiti kameng ti Liga ng mga Barangay- Ilocos Norte Chapter.
Kabayatanna, indanon pay ni Pascua ti panagyaman na kadagiti kameng ti liga ken dagiti amin a nangsuporta iti insayangkat dagitoy a “bloodletting” iti kallabes.
Inbatadna a sigurado nga adu manen dagiti maiyatiddog ti panagbiagna gapu kadagiti nasao a dara a naidonar iti inyuswatda nga aktibidad.
Innayonna nga agtultuloy pay ti panangsuporta ti Liga ng mga Barangay-Ilocos Norte Chapter iti pannakatagiben ti aglawlaw nga agpada nga itantandudu da Gob. Cecilia Araneta Marcos ken ni Bise Gobernador Matthew Marcos Manotoc.
Kunana a daytoy ti rason a tinawen nga adda ti “tree planting” nga isaysayangkat ti liga, sabali iti umuna a Distrito ken sabali iti maikadua a Distrito ti probinsia.
