LAOAG CITY – Umabot iti 200 nga indibidwal iti naipadalan ti aggressive community testing wenno expanded targeted testing iti Brgy. 1 ditoy ciudad ti Laoag.
Daytoy ket paset pay laeng ti addang para ti pannakalapped ti panagwaras ti virus iti nasao a barangay.
Segun kenni Dr. Norman Rabago, Provincial COVID-19 Consultant, kalikagum a maipadalan iti testing ti agarup 400 a populasyon ti Brgy. 1 tapno madeterminar dagiti nakaptan ti virus.
Kunana a ti pagsayaatanna ita ket makikooperar dagiti kabarangayan na ken awan dagiti nagkedked nga agpatest ngem kadagiti napalabas a pannakaisayangkat ti mass testing ket adu dagiti saan a mangayat a maipadalan iti testing.
Nagpanawagan ti COVID-19 Consultant kadagiti nadeterminar a close contact dagiti nagpositibo ti COVID-19 nga agtulnog dagitoy a dumalan iti testing para ti alalisto a panagimbag ti intero a komunidad.
Manamnama nga intono bigat ket malpasen iti panangisayangkat da ti agressive community testing.
Maipalagip nga itay laeng kallabes, nakaimaldit ti nasurok 20 a nagpositibo ti COVID-19 a dagitoy ket partidor iti nasao a barangay.
