LAOAG CITY – Umaboten iti 202 a registered firearms ti naisuko iti nagduduma a police stations iti intero a probinsia ti Ilocos Norte sipod idi bulan ti Hunyo agingga idi Septiembre 8, 2023.
Daytoy ti inpakaammo ni Police Major Jephre Taccad, ti pannakangiwat ti Ilocos Norte Police Provincial Office (INPPO).
Inbatadna a kaadoan kadagiti napan nangisuko ti paltogna ket dagiti opisial ti Barangay.
Inlawlawagna nga adda ti 53 a paltog ti naisuko no sadino 9 a paltog ti nakumpiskar babaen ti naisayangkat nga operasion ti nailian a pulisia, 12 ti narekobre a paltog, 56 a paltog ti naideposito a registered firearms ken 72 a paltog ti naideposito nga expired ti lisensyana.
Kabayatanna, inpasingked ni Taccad nga agtultuloy latta ti panangallukoy ken panawaganda kadagiti gun holders a saan pay a napan nagideposito ti paltogda a kanayon a silulukat dagiti nagduduma a kuerpo ti pulisia a mangakomodar kadakuada.
Maipalagip nga inrakurak ni Provincial Director Police Col. Julius Suriben a kalikagumna a maideposito amin a paltog dagiti gun holders iti intero a probinsia tapno maliklikan ti pannakausar dagitoy iti aniaman a krimen agingga a saan a malpas ti Barangay ken Sangguniang Kabataan Elections.
