LAOAG CITY – Nakurang ti 700-milyon a pisos ti 2024 Annual Budget ditoy ciudad ti Laoag.
Segun Konsehal Jeff Fariñas, ti chairman iti Committee on Finance and Appropriations, P1.14- Billion ti budget ditoy ciudad ti Laoag para iti 2024.
Nupay kasta, inbatad ni Fariñas a ti pakabuklan ti budget proposal dagiti amin a departamento iti gobierno lokal ditoy ciudad ket P1.7-billion.
Inpakaammo ni Fariñas a ti 720-milyon iti P1.14- Billion ket manipod iti tax allotment idinto a ti 173-milyon ket aggapo iti koleksyon ti treasury ken ti 121-milyon ket estimated collection ti Economic enterprise.
Gapu iti daytoy, kuna ni Fariñas a napagnunumoan dagiti amin a departamento iti gobierno lokal ditoy ciudad nga iyan-anay da lattan ti nakasagana a pondo.
Inpasingked ni Fariñas a kalpasan a maurnus dagiti maseknan ti pondo ket isumitir danton iti konseho para iti budget deliberation.
Mainaig iti daytoy, kalikagom ni Vice Mayor Carlos Fariñas a nasapsapa iti pannakaaprubar ti pondo ditoy ciudad ken saanen nga umabot iti disyembre ita a tawen.
