LAOAG CITY – Inpannakkel ni Senate President Vicente Sotto III a ti 2026 national budget ti kadalusan a budget iti pakasaritaan ti pagilian sipod idi 1992.
Inbatad ni Sotto, uray idi maipatpatungpal pay laeng ti Countrywide Development Fund manipud idi 1992 agingga iti 1998, limitado laeng ti mabalin a maamendaran dagiti agpanpanday linteg—P75 a milyon para kadagiti kongresista ken P200 a milyon para kadagiti senador.
Inadmitirna nga uray idi pay laeng ket adda dagiti mapaspasamak a gundaway iti korapsion ti pundo.
Kabayatanna, inpasiguradona a saan a palubosan ti Bicameral Conference Committee iti panangisingit ti aniaman a klase ti “pork barrel” ken ghost projects.
Innayonna nga inbilinna ni Senate Committee on Finance Chairman Senator Sherwin Gatchalian a no ania laeng ti napagsaritaan iti budget deliberations ti Senado ken Kamara ti pagdedebatean iti Bicameral Conference Committee.
