LAOAG CITY – Naiyuswat ti ground breaking ceremony iti bypass road paset ti Barangay Tangid ditoy ditoy ciudad ti Laoag para iti pannakaestablisar ti bike lanes.
Karaman kadagiti opisyal a nagatendar iti daytoy ket ni Transportation Sec. Jaime Bautista, Asst. Sec for Road Transport and Infrastracture James Andres Melad, Dept. of Public Works and Highways Region 1 Regional Director Ronnel Tan, Region 1 OIC Asst. Regional Director Mathias Malenab ken District Engr. Glenn Miguel.
Kasta pay ni Vice Gov. Cecilia Araneta Marcos, Cong. Sandro Marco, Mayor Michael Marcos Keon ken Vice Mayor Carlos Fariñas.
Ti nasao a proyekto ket napondoan ti 21.7 milyon a pisos a naggapo iti General Appropriations Act 2022 iti Dept. of Transportation ken agatiddog ti 1.6 kilometers iti kada linya wenno 3.20 kilomters iti dua a linya.
Naamoan a manamnama a mausar ti bike lanes intono bulan ti Oktubre ita met laeng a tawen.
Naamoan a ti bike lane ket addaan ti Class 1 and 2 Cycling lane no sadinno mabenipisyaran dagiti residente ditoy ciudad ken dagiti bisita ken agbalin a modelo iti sabali a lugar kas World Class Infrastructure.
Kuna ni Tan a pondo daytoy ti Dept. of Transportation nga inted na laeng iti Dept. of Public Works and Highways para iti proyekto.
Kabayatanna, inbatad na a posible a dumanon pay daytoy iti ili ti Bacarra no adda ti nayon a pondo a 96 a milyon a pisos ken posible pay nga agingga iti Paoay lake.
