LAOAG CITY – Umaboten ti 77 a kaso ti coronavirus disease 2019 wenno COVID-19 iti Hawaii kalpasan a nainayun ti 21 a tattao a nagpositibo iti nasao a virus.
Iti report ni Bombo International News Correspondent Manny Pascua iti Hawaii, ti Honolulu ti kaaduan gapu ta addaan ti 53 a kaso ti virus.
Kuna na a lima ti kaso ti virus iti Big Island, tallo a kaso iti Kauai, ken dagiti dadduma a kaso ti virus ket adda da iti sumagmamano pay nga ospital.
Segun kenni Pascua, kaaduan kadagiti kaso ti COVID-19 ket addaan ti travel history.
Kabayatanna, madanagan ti gobyerno ti Hawaii gapu ti posible a panagkurang ti suplay dagiti kangrunaan a kasapulan dagiti tattao no agtultuloy ti panagngato ti kaso ti nasao a virus.
Inpatungpal ni Honolulu Mayor Kirk Caldwell ti stay home order a nangrugi iti aldaw ti Domingo iti nasao a lugar.
Innayon ni Pascua a manamnama a maipatungpal intono Huebes idiay Hawaii ti 14 nga aldaw a pannakaidalan iti quarantine dagiti agturong iti Hawaii a nagbiyahe iti sabali a lugar.
Adda pay ti maiyannatop a pannusa a maipataw kadagiti agsalungasing ti pammilin kas iti mandatory quarantine.
