LAOAG CITY – Nagballigi dagiti kameng ti Philippine National Police iti insayangkat da a search operation iti pagtaengan ni Alyas Niki, agtawen ti 37, naasawaan, mannalon ken residente iti Barangay Bacsil South ditoy ciudad ti Laoag.
Naiserbi ti search warrant gapu iti panaglabsing iti Republic Act 10591 wenno panagikot iti caliber 38 a paltog ken ti panaglabsing iti Republic Act 9165 wenno Comprehensive Dangerous Drugs Act of 2002.
Awan ti subject ti operasyon idi naisayangkat ti operasyon ngem adda dagiti nakumpiskar dagiti otoridad iti uneg ti pagtaengan ti suspek a 21 a sachet a naglaon ti maatap a shabu, maysa a caliber 38 a paltog nga addaan ti tallo a bala, ken  dua a bala  ti 5.56.
Mainaig iti daytoy, inpetteng ti pamilya ti subject ti operasyon nga adda dagiti immuna a simrek iti balay da sakbay a naipatungpal ti pormal nga operasyon.
Naamoan a ti nasao a balay ket addaan ti closed-circuit television (CCTV) camera ngem maipagarop a ti nakamuntar iti ruwar ket nagpukaw.
Kabayatanna, masdaaw ni Barangay Kagawad Franklin Cabarrubias, uliteg ti suspek iti naisayangkat a search operation gapu ta awan met ti madamdamag da nga illegal nga ar-aramiden ti kaanakan na.
Inlawlawag na a sipud nakaruwar iti pagbaludan ti kaanakan na ket naobserbaran da a naminpinsanen a nagbalbaliw.
Innayon na nga arigna kanayun da agkitkita gapu ta agpapada nga agtaltalon.
