LAOAG CITY – Addaan aminen nga ili ken siudad ditoy Ilocos Norte ti kabukbukudan a fire truck.
Mainaig iti daytoy, inbunannag ni Gob. Matthew Marcos Manotoc a maibilang ti pannakaiyawat ti saggaysa a fire truck iti ili ti Adams ken Carasi a “historic” wenno paset iti pakasaritaan ti Ilocos Norte.
Inbatadna a daytoy ti kaunaan a gundaway a maaddaan amin nga ili ken siudad ditoy probinsia iti bukud a fire truck iti tulong dagiti dua a diputado ti probinsia pakairamananda Senador Imee Marcos ken ni Presidente Ferdinand R. Marcos Jr.
Inpadanon pay ti gobernador ti panagyamanna iti mangbukbukel iti Regional Office ken iti Central Office ti Bureau of Fire Protection ken ti Department of the Interior and Local Government.
Kagiddan daytoy, kunana a masapol ti panangsaluad dagiti kameng ti Bureau of Fire Protection kadagiti naipaima kadakuada a fire truck.
Mamati ni Gob. Manotoc nga agbalin nga epektibo ti pannakausar dagiti fire truck babaen iti kaadda ti napintas a koordinasyon ti Bureau of Fire Protection ken dagiti City/Municipal Disaster Risk Reduction Management Offices ken kadagiti barangay.
Ginutigotna dagiti kameng ti Bureau of Fire Protection nga alisto nga aggungunay ken agbalin a responsable para iti naannayas nga operasyon ti ahensia ken maipaayan ti napintas a serbisio dagiti kakailian.
Binigbig manen ti gobernador ti dakkel a maitultulong ti Bureau of Fire Protection iti komunidad nangnangruna idi kangitingitan ti pandemia a gubuay ti COVID-19.
Mainaig iti daytoy, inpatalgedna ti naan-anay a suportana ken ti sibubukel a gobierno probinsial iti Bureau of Fire Protection Ilocos Norte ken iti Bureau of Fire Protection kadagiti amin nga ili ken siudad ditoy probinsia.
Kabayatanna, segun ken ni Chief Superintendent Leonida Gumanab Rosales, regional director ti Bureau of Fire Protection ti rehion uno, daytoy ket babaen iti naiget a suporta ni Gob. Matthew Marcos Manotoc.
Kunana a kaipapanan daytoy nga amin nga ili ken siudad ditoy Ilocos Norte ket maaddaanen ti kabukbukudan a Bureau of Fire Protection Station.
Inlawlawagna a kaudian iti ili ti Adams a maaddaan ti Bureau of Fire Protection station ditoy probinsia.
Mainaig iti daytoy, inbunannagna a para iti naep-epektibo a panagserbi ti Bureau of Fire Protection ket kasapulan ti naan-anay a suporta dagiti opisial kangrunaanna ti mayor ken ti sibubukel a komunidad.
Kagiddan daytoy, inpakaammo ni Rosales a sakbay ti pormal a pannakaiyawat dagiti baro a fire truck ti probinsia ket maipadalan nga umuna dagiti pakaiyawatan dagiti baro a fire truck iti training a pakairamanan ti Bureau of Fire Protection Adams a naipaayan ti maysa a baro a fire truck.
