LAOAG CITY – Umabot iti 22 a tattao ti nasugatan iti idadayyeg ti magnitude 5.4 a gingined iti ciudad ti Lijiang a maibilang a nalatak a tourist destination idiay China.
Basar iti United States Geological Survey (USGS), ti gingined ket nagsentro iti border a nagbaetan ti Yunnan ken ti probinsya ti Sichuan, ken addaan ti kauneg a 38 a kilometro wenno 24 a milya.
Inbatad ti Yunnan Seismological Bureau a dua ti nakana a nasugatan manipud kadagiti 22 a biktima ti napasamak a gingined.
Ti China ket masansan a dayyegen ti napigsa a gingined kangrunaan na iti kabanbantayan a paset ti western ken southwestern regions.
Maipalagip nga idi 2008 ket dinayyeg ti magnitude 7.9 a gingined idiay Sichuan a nakatayan ti nasurok a 80,000 a tattao no sadinno a kaadoan kadagitoy ket ubbing nga adda kadagiti pagadalan iti dayta a gundaway.
