LAOAG CITY – Umabot iti 22 a tattao ti natay iti “massive fire” iti games arcade idiay India.
Basar iti report, sumagmamano kadagiti biktima ket ubbing.
Immuna iti daytoy, nakita ti gil-ayab ken nabengbeng nga asok nga agpangato iti tangatang a batog iti pasdek idiay Rajkot, iti makindaya nga estado ti Gujarat.
Mapagam-amkan nga ado pay dagiti biktima a napupuk iti baba dagiti wreckage, pakairamana dagiti ubbing.
Mainaig iti daytoy, inadmitir dagiti otoridad a marigatan da a mangbigbig pay kadagiti biktima gapu iti nakaro a pannakauram ti bagida.
Agpapan ita ket saan pay a masinunuo no ania ti nangrugyan ti napasamak nga uram.
Kabayatanna, inrakurak ni Indian Prime Minister Narendra Modi a mariribukan unay iti napasamak nga uram iti Rajkot kagiddan ti panangidanun na ti pannakipagladingit na kadagiti napukawan ti ipatpateg iti biag.
