LAOAG CITY – Inbatad ti International Committee of the Red Cross a nadadael dagiti opisinada idiay Gaza gapu iti panagbomba, a nakatayan ti 22 a tattao.
Segun iti ahensya, heavy-calibre projectiles ti nagdisso iti uneg ti sumagmamano a metro manipud iti opisina ken kadagiti pagtaengan da.
Innayon ti International Committee of the Red Cross nga obligasion ti amin a partido nga agannad tapno maliklikan ti pannakadangran dagiti sibilian ken humanitarian facilities.
Kinuna met ti maysa a pannakangiwat ti Israel Defense Forces, nga awan ti aniaman nga indikasyon idi napasamak ti panagbomba.
Malaksid kadagiti 22 a natay ket 45 pay ti nasugatan, no sadinno nga iti agdama ket adda da iti ospital.
Mainaig iti daytoy, inawagan ti International Committee of the Red Cross ti insidente kas maysa “grave security incident”.
Kabayatanna, ti insidente ket adda pay laeng pakainaiganna iti rinnanget a mapaspasamak iti nagbaetan ti militar ti Israel ken ti armado a grupo ti Palestina.
