LAOAG CITY – Inpasingked ni Fire Officer III John Patrick Angel iti BFP Laoag nga addan ti 22 a naaprubaran nga aglako ti paputok ditoy siudad ti Laoag.
Kuna na a nakapwesto dagitoy iti sirok ti gilbert bridge, ti naituding a pagyananda nga aglako.
Mainaig iti daytoy, inlawlawag na a maipawil ti panaglako kadagiti napipigsa a paputok kas iti super lolo, whistle bomb, goodbye philippines pakairamanan ti boga ken sky lantern.
Inbalakad na pay a nu man agpaputok ket masapol a mapan iti open field wenno dagiti awan ti madalapos a pagtaengan ken adayu a pamungayan ti uram.
Kabayatanna, kuna ni Angel a nu adda man ti mangayat pay nga agala ti permit nga aglako ket ikkanda laketdi maipalubos pay laeng iti naituding nga oras.
