LAOAG CITY – Nagbaliktad ti maysa a 22 wheeler tanker truck iti national highway paset ti Bgy. Lang-ayan iti ili ti Currimao kalpasan a nagsina ti truck ken ti trailer a guyguyuden na.
Segun ken ni P/Cinsp. Marlon Padamada, Hepe ti Pulisya ti nasao nga ili, nagbaliktad ti nasao a truck a nagkarga ti liquified petroleum gas (LPG) gapu ta naikkat ti “lock” iti nagbaetan ti truck ken ti trailer bayat nga agpapaamyan a direksiyon ken addan iti kurbaan a paset ti nasao a kalsada.
Kuna na a nagkarga daytoy iti agarup 24 a ribo a litro ti LPG ken naggapu iti Pangasinan ken agideliver koma iti paset ti Bgy. Magnuang iti ciudad ti Batac.
Kabayatan na, inbaga ti driver ti truck a ni Reynante de Arce , agtawen ti 35, awanan sawa ken agindeg iti Purok 2, Bangoy St. Davao del Norte, saan na a nadlaw a naikkat ti “lock” ti inmaneho ket idi agkurba, saanan a maiturong pay ti manibela ti nasao a lugan.
Nagsagaba ti driver ti gagas iti makinkatigid nga ima.
Nangitunda met ti nakaro a trapiko ti nasao nga aksidente gapu ta saan a mabalin a madalanan ti aniaman a klase ti lugan.
