LAOAG CITY – Inbatad ti Department of Health (DOH) a natay ti agarup ti 220 nga indibidual iti leptospirosis, idinto a 3,440 a kaso ti nairekord manipud Enero agingga iti Agosto 8.
Kinuna ni DOH Disease Prevention and Control Medical Officer Dr. Anne Dominique Asis-Matuba a nababbaba ti agdama a bilang dagiti kaso no idasig iti 5,318 a nairekord bayat ti isu met laeng a period itay napan a tawen. Nupay kasta, nainget ti panangmonitor ti departamento iti posible nga iyaadu dagiti kaso kalpasan ti kallabes a layus.
Binalakadan ti DOH dagiti sumsurek iti danum ti layus a dagus a bugguan ti bagida iti sabon ken nadalus a danum ken, no mabalin, agusarda iti protective boots ken abbongan ti aniaman a nakalukat a sugat no saan a maliklikan ti panagballasiw iti danum ti layus.
Nagutigot met dagiti nagannak a saanda a palubosan dagiti ubbing nga aglangoy wenno agay-ayam iti danum ti layus.
Kinuna ti DOH a kapatgan ti agpakonsulta iti health center wenno doktor iti uneg ti 24 agingga iti 48 nga oras kalpasan ti pannakaisarang iti danum ti layus, nangruna kadagiti addaan iti dakkel a risgo a maakaran iti leptospirosis.
