LAOAG CITY – Maisagsaganan ti reklamo a maipila kontra ti maysa a lalaki kalpasan a natiliw iti naiwayat a drug buy bust operation iti Brgy. 29 ditoy siudad ti Laoag.
Nabigbig ti lalaki a ni Jan-Jan Silbano a residente ti Brgy. Camanggaan iti nasao a siudad.
Naglikodan ni Silbano nga aglak-lako ti maipawil a druga.
Immuna iti daytoy, inlawlawag na a nagusar ti shabu sakbay a nagturong iti am-ammo na nga agnagan ti Jay-Ar Lorenzo tapno agbayad ti utang na iti sugal.
Kuna ni Silbano nga inawat na ti inyawat ti am-ammo na a maysa a sachet a naglaon ti maipagarup shabu kalpasan ket pimmanaw.
Dita metten a dagus a kinemmeg dagiti otoridad a nakaalan da ti naiyawat a shabu, ken 500 a pisos a marked money.
Naglikodan ni Silbano a kukua na ti 500 a pisos a marked money.
Naamuan a damo ni Silbano ti agusar ti illegal a druga.
