LAOAG CITY – Mapatta-patta nga umabot 228 a milyon dagiti ubbing ken nataengan nga agbibiag nga agpaspasar ti obesity apaman a madanun ti 2040, manipod iti 177 a milyon idi 2025.
Daytoy ket basar iti report ti World Obesity Federation.
Ti projection ket naipublikar iti 2026 World Obesity Atlas report, no sadinno a nagballaag a ti childhood obesity ket alisto ti panagwaras na iti lubong.
Basar iti atlas, dagiti makapaspasar ti obesity nga ubbing nga agtawen ti 5–19 ket manamnama a ngumato manipod iti 8.7 percent idi 2025 ket agbalin a 11.9 percent apaman a madanun ti 2040.
Naamoan a nasurok a 180 a pagilian ti nakairekord ti panagngato ti childhood overweight ken obesity sipud idi 2010.
Segun iti report, ti panagngato ti bilang dagiti ubbing nga agpaspasar ti obesity ket gapu ti dakkel a nagbalbaliwan ti global nutrition trends.
