LAOAG CITY – Umabot iti 23 a tattao ti natay a sumagmamano kadagitoy ket menor de edad idinto nga agarop 70 dagiti nakalugan ti subway train a nasugatan kalpasan a narpuug ti paset ti metro overpass idiay Mexico City.
Iti inisyal a datos nga inparuk-at ti Mexico Comprehensive Risk Managemnet and Civil Protection Agency, napasamak ti insidente kabayatan ti panagbiyahe ti subway train iti agpangato a paset ti metro line 12 wenno maaw-awagan ti Golden Line idi nag-collapse ti paset ti metro overpass.
Segun kenni Mexico City Mayor Claudia Sheinbaum, naipit iti napasamak nga insidente ti maysa a lugan iti baba ti nagreggaay a paset ti overpass.
Mangiyus-uswat metten ti emergency service team ken rescue operation para iti possible a pannakarekobre kadagiti survivor.
Maipalagip a tawen 2012 idi nalukatan iti publiko ti metro 12 line a naipatakder iti babaen ti liderato ti dati a mayor iti ciudad a ni Foreign Minister Marcelo Ebrard a nangirakurak met ti pannaki-simpatya na kadagiti biktima ken pamilya da ken inpetteng na a masapol a maimbestigar ti napasamak nga insidente.
