LAOAG CITY – Inpakaammo ni Mr. Marcell Tabije, ti mangidadaulo iti Provincial Disaster Risk Reduction and Management Office nga addan ti naiparuk-at nga abiso kadagiti Local Chief Executive maipapan iti panagsagsagana ti probinsia ita a panawen ti panagtutudo.
Segun kenkuana, idi Mayo 23 ket addan ti nasapa a pakaammo ti opisinada kadagiti nagduduma a Local Government Units ditoy probinsia tapno masaganaan a naimbag ti isasangbay ti kalamidad.
Inbatadna a naiget ti panangmonitorda kadagiti evacuation center, nagduduma nga equipment ken dadduma pay a kagamitan a mausar para iti rescue operations.
Inlawlawagna a maikkan pay ti naan-anay nga importansia dagiti livestock shelters a pakaikabilan dagiti ayup a maapektaran iti iduduprak ti bagyo wenno napigsa a tudo.
Kunana a maballaagan dagiti mangngalap ken residente kadagiti coastal areas a saanda a mapan agkalap iti baybay no adda ti gail warning a naiyetnag tapno saan a mairisgo ti biagda.
Innayonna a nakasaganada pay a tumulong kadagiti umili a Persons With Disability kadagiti kasapulanda tapno maiyasideg ti napintas a serbisio manipod iti gobierno probinsial.
