LAOAG CITY – Inrakurak ni Bombo International Correspondent Manny Pascua idiay Hawaii a nagtalinaed a kritikal ti kondisyon dagiti tallo a turista manipod kadagiti 23 a nasugatan iti napasamak a “lava bomb” idiay Kapoho Bay.
Segun ken ni Pascua, timmama ti ‘lava bomb” ti maysa a tourist boat a nagluganan dagiti 53 a tattao, 49 kadagitoy ket turista ken 23 kadakuada dagiti nasugatan.
Inbatad na a nagturong dagiti biktima iti Kapoho bay iti Lower Puna, Big Island tapno mapan da buyaen ti agtaptapwak a lava manipod iti Kilauea volcano idi mapasamak ti insidente.
Kuna na a tallo kadagiti nasugatan ket naikabil iti Hilo Medical Center.
Innayon na a gapu ti napasamak a lava bomb ket naputed ti gurong ti maysa kadagiti nasugatan nga agtawen iti 20 a babai.
Kabayatanna, pinawilan pay laeng dagiti otoridad dagiti tourist boat nga umasideg iti pakapaspasamakan iti lava flow.
