LAOAG CITY – Umabot iti nasurok a 230 a chinese nationals ti natiliw dagiti otoridad idiay Sri Lanka iti cybercrime raids.
Basar iti report, dagiti natiliw a tsino nga agpapada a lallaki ket maak-akusaran a puntirya da dagiti international banks iti online scams.
Inbatad ni foreign minister Vijitha Herath a naduktalan da ti plano dagiti suspek babaen ti tulong manipod iti security officials nga inpatulod ti Beijing.
Nakumpiskar dagiti otoridad iti lugar a pagnanaedan dagiti suspek ti 250 a computer ken 500 a mobile phones nga us-usaren da iti illegal nga aktibidad da.
Iti agdama, manarimaan paylaeng ti imbestigasyon dagiti otoridad no kasanu ti kadakkelen ti kwarta a natakaw dagiti suspek.
Ti Sri Lanka ket addaan ti natibker a telecommunication infrastructure ken isu ti kaunaan iti South Asia a nangipatungpal ti 5G network idi Abril 2019, tallo a tawen sakbay a nalugi iti pinansyal ti nadakamat a pagilian.
Maipalagip nga idi Hunyo ita a tawen ket immuna a natiliw dagiti otoridad ti 200 a suspek a kaadoan ket Indian a maipagarop nga agop-operar iti online financial scams iti Sri Lanka.
