LAOAG CITY – Ballaigi a nagturpos dagiti 24 a Persons Deprived of Liberty iti programa ti Katatagan, Kalusugan, at Damayan ng Komunidad iti ciudad ti Batac nga addaan ti 18 a modules.
Inlawlawag ni Jail Officer Markphil Subia a ti gagem ti programa a Katatagan, Kalusugan, at Damayan ng Komunidad wenno KKDK ket ti pannakaikkat ti stigma iti ciudad ti Batac seknan iti panagusar ti iligal a droga.
Kunana nga iti babaen daytoy a programa, maikkan ti gundaway dagiti Persons Deprived of Liberty nga agatendar ti modular nga inpublikar ti Psychological Association of the Philippines, tapno balakadan dagiti agus-usar ti iligal a droga a maysa daytoy a sakit nga mangapektar iti kapasidad ti utek ti maysa a tao.
Mainaig iti daytoy, ti nagbalin nga speaker iti panagturpos dagitoy ket ni Regional Director Jail Senior Superintendent Florente Nisperos.
Segun ken Subia, binalakdan ni Nisperos dagiti naggraduar ti Katatagan, Kalusugan, at Damayan ng Komunidad Program a saan dan nga uliten wenno sublianan pay ti dati a bisyo da, pakairamanan ti panagsigarilyo ken panaginom ti arak.
Naipayan met dagiti nagturpos ti certficate of completion ken impasigurado ni Subia a ti Katatagan, Kalusugan, at Damayan ng Komunidad a sertipikasyon da ket mausar da iti ruar.
Kabayatanna, inbatad met ni Jail Superintendent Freddie Villon a malaksid ti daytoy ket ado pay ti programa nga isaysayangkat ti Bureau of Jail Management and Penology – Batac City a makatulong kadagiti pamilya dagiti balod.
Maipalagip a nangrugi ti Katatagan, Kalusugan, at Damayan ng Komunidad Program idi 2019 ngem idi laeng napan a tawen a nangrugi ditoy probinsya.
