LAOAG CITY – Nagballigi ti Philippine National Police (PNP), Philippine Drug Enforcement Agency (PDEA) ken Provincial Drug Enforcement Unit a nangtiliw iti maysa a drug personality iti naiyuswat a drug buy-bust operation ditoy ciudad ti Laoag.
Nabigbig ti suspek a ni Benjamin Jay-ar Lorenzo, agtawen ti 33 ken residente iti Barangay 7-B ditoy ciudad ti Laoag.
Ni Lorenzon ket adda ti Street Level Target (SLT) ti PNP iti ciudad ti Laoag.
Natiliw ni Lorenzo kalpasan a naglako ti maysa a sachet a naglaon ti maipagarop a shabu iti nagpammarang a poseur buyer.
Malaksid iti daytoy, naala pay iti ikot ti suspek ti maysa nga sling bag nga ayan ti 2 a dadakkel a sachet ken uppat a babassit a sachet a naglaon ti maipagarop a shabu, drug paraphernalia ken ti kwarta a nausar iti operasyon.
Naala pay iti ikot ti suspek ti maysa nga airsoft pistol nga addaan iti silincer.
Mapatta-patta nga agbalor ti 24 a ribo a pisos ti presyo dagiti maipagarop a shabu a naala iti ikot ti nasao a suspek.
Iti agdama, nagtalinaed ni Lorenzo ti kustodyar ti PNP-Laoag ngem nagkedked pay laeng daytoy a nangipaay ti komento na seknan iti alegasyon kenkuana.
