LAOAG CITY – Saan a nakalapped ti apagaman a panagtudo iti panagmartsa dagiti 2,424 a nagturpos nga agad-adal iti Mariano Marcos State University.
Indauloan ni Magna Cum Laude Maxime Gaile Pomoy, sociology student, ken isu ti Valedictorian ti Class 2022 iti MMSU.
Mainaig iti datoy, 507 manipod iti kadagupan a bilang dagiti honor graduates ken maibilang nga isu ti kaaduan iti pakasirataan ti unibersidad.
Iti nasao a bilang, 27 dagiti nagturpos a magna cum laude, 479 a cum laude ken maysa ti with distinction.
Amin dagitoy ket naipresentaran ti medalya babaen ken ni MMSU president Dr. Shirley Agrupis, University Vice President pakairamanan dagiti miembro ti University Academic Award Committee.
Kabayatanna, ti nagbalin a Guest of Honor and Speaker iti maika-44 a Commencement Exercises iti MMSU ket ni Dr. Arsenio Balisacan, maysa a 1979 BS Agriculture graduate iti MMSU ken agdama a secretary iti National Economic and Development Authority (NEDA).
Naiyuswat ti Commencement Exercises iti Sunken Garden a makita iti mismo a likudan ti Administrative Hall ken sango iti Library iti MMSU.
