LAOAG CITY – Naawaten ti probinsya nga Ilocos Norte ti inisyal a suplay ti covid-19 vaccine manipod iti Sinovac ti China.
Indauloan ni Governor Matthew Marcos Manotoc ti pannakawat iti bakuna kadua ti dadduma a kameng ti Department of Health ditoy probinsya kas kada Dr. Norman Rabago, ti Provincial Health Consultant kenni Dr. Josephine Ruedas, ti Provincial Health Officer.
Adda ti 2,446 doses ti sinovac vaccine ti inyawat dagiti kameng ti DOH Region 1 kenni Gov. Manotoc iti mismo provincial capitol.
Kalpasanna, ket naipan a dagus iti cold storage facility a naiyetablisar iti Provincial Health Office dagiti bakuna.
Mainaig iti daytoy, tallo nga ospital ditoy sa probinsya ti naituding a mangiyuswat ti vaccine roll mangrugi ita nga aldaw.
Daytoy ket partikular iti Mariano Marcos Memorial Hospital and Medical Center iti siudad ti Batac, Governor Roque B. Ablan Sr. Memorial Hospital ken iti Laoag City General Hospital ditoy siudad ti Laoag.
Kabayatanna, target nga ummuna a mabakunaan dagiti frontline health worker kangrunaan na dagiti agpapaay kadagiti nadakamat nga ospital.
Immunan a nangiyuswat ti probinsya iti vaccine simulation kadagiti naglabas nga aldaw kas panagsagana para iti vaccination roll out.
