LAOAG CITY – Umabot ti 249 nga agtutubo iti manamnama a maipaayan iti pammadayaw iti panakaiwayat ti SIRIB awards 2024.
Daytoy ti inbatad ni Ms. Weenter Ventura iti Youth Development Officer II iti Ilocos Norte Youth Development Office.
Inbatad na a ti nasao a pammadayaw ket kas pamigbig kadagiti nakisalipan dagiti agtutubo iti national ken international.
Inpakaamo ni Ventura a manipod iti pakabuklan a 249 ket 10 kadagitoy iti topnotchers, 5 ti nakagun-od iti international awards, 2 national special recognition, 41 national indibidual awardee, 18 national group awardee, ken 4 international group awardee.
Kunana a ti nasao nga aplikasyon ket nangrugi idi Disiembre 2023 ken nagleppas idi Enero 8 ita a tawen.
Segun kenni Ventura, manamnama nga umawat dagiti agtutubo ti medalya, certificate ken cash.
Inpetteng na a babaen iti daytoy ket magutigot pay dagiti agtutubo nga itultuloy ti panakipagpaset da kadagiti nagduduma a kompetisyon ti national ken international gapo ta daytoy ket pakaidayawan pay iti intero a probinsiya.
Kabayatanna, inrakurak ni Ventura nga awan pay ti naituding nga aldaw a panakaiwayat t nasao a SIRIB awards.
