LAOAG CITY – Inpangato ti gobyerno ti Italya ti immunan a nailatang a 7.5 a bilyon a Euro ket napagbalinen a 25 a bilyon a Euro kas mausar a pondo seknan ti coronavirus disease.
Iti report ni Bombo International News Correspondent Demetrio Rafanan iti Rome, Italy, inngato ti gobyerno ti Italya ti nasao a pondo gapu ti alisto a panagngato ti bilang dagiti naapektaran ti virus kasta met dagiti pimmusay.
Basar iti datos ti Civil Protection ket umaboten ti 17,660 ti bilang dagiti naapektaran ti COVID-19 idinto a 1,266 dagiti pimmusay.
Umabot met ti 1,439 dagiti naagasan manipud iti nasao a virus.
Mainaig iti daytoy, inrakurak ni Rafanan ti panagrekepen ti International Airport ti Milan, a maibilang a major international airport iti Italya a sumaruno iti Fiumicino Roma Airport.
Innayon ni Rafanan a gimmatang ti adu a sili a labuyo gapu ta mamati a napigsa a pangkontra daytoy iti COVID-19.
