LAOAG CITY – Inkiddaw ni Ms. Cathy Estavillo, pannakangiwat ti Bantay Bigas ti 25 a ribu a pisos a production subsidy iti tunggal mannalon iti intero a pagilian a Pilipinas.
Segun kenkuana, daytoy ket kalpasan nga agtultuloy ti panagbaba ti presio ti irik dagiti mannalon, renta ti makinaria, pagpadanum ken dadduma pay ket saan a masolsolbar ti gobierno.
Inbatadna a daytoy ket tapno maalay-ayan ti agtultuloy a panagngato ti cost of production dagiti mannalon a saan a bumaba iti 60 a ribu a pisos iti kada ektaria no sadinno a dumanon pay iti 70 a ribu a pisos iti kada ektaria iti panawen ti kalgaw.
Mainaig iti daytoy, inpetteng ni Estavillo nga awan ti uray maysa a rice smugglers ti naipabalud wenno napatawan ti pannusa iti babaen ni Presidente Ferdinand Marcos Jr. iti baet nga adda dagiti linteg a naipatungpal tapno mapagsungbat dagitoy.
Innayonna a mangnamnama daytoy nga i-review ni Sen. Kiko Pangilinan kas baro a Chairman ti Committee on Agriculture iti Senado mainaig iti Republic Act No. 11203.
Immuna iti daytoy, inbilin ni Presidente Ferdinand Marcos Jr. ti pannakasuspenso iti uneg ti 60 nga aldaw ti importasion ti bagas nga epektibo inton Septiembre 1, 2025.
