LAOAG CITY – Naipaayan ti 250 a senior citizens iti ili ti Piddig ti libre a panagbuya ti sine iti dakkel a mall ditoy siudad ti Laoag.
Segun ken ni Mayor Gina Guillen iti ili ti Piddig, sipod pay idi umuna a terminona kas Mayor idi tawen 2016 ket inruginan daytoy a programa a pannakaipaay ti libre a panagbuya ti sine kadagiti senior citizens.
Inbatadna a daytoy ket itultuloyna agingga iti daytoy a terminona gapu ta dakkel ti pammatina a napateg a maipaayan ti pagliwliwaan dagiti natataengan nangruna ket manmanoda laeng a makilangen-langen.
Inlawlawagna a ti gagangay a maipapaayan iti daytoy ket sumurok 300 ngem gapu ta dua a movie house laeng ti naakuparanda iti agdama iti dakkel a mall.
Inpettengna pay a dagitoy ket manipud iti nagdududma a barangay iti ili ti Piddig.
Maragsakan ti Mayor gapu ta adda dagiti senior citizens a mangibaga kenkuana a babaen iti daytoy ket napadasanda ti makastrek iti mall ken makabuya iti cinema.
Innayonna a malaksid iti panagbuya iti sine ket inpaayan pay ti dakkel a mall dagitoy ti libre a pannangan.
