LAOAG CITY – Naragsak nga inpakammo ni Mr. Justin Paul Marbella, ti Information Officer iti Dept. of Labor and Employment (DOLE) Region 1 a kaadoan kadagiti establishimento ket sumursurot iti General Labor Standards.
Segun kenni Marbella, daytoy ket basar iti 2022 Labor Inspection Program results ti Department of Labor and Employment Regional Office 1, a naireport iti 2022 Yearend Performance Assessment.
Inbatad na nga umabot iti 2,506 a pasdek negosyo ti nabisita ti ahensya iti napalabas a tawen ken sakop iti inspection activities ti 56,293 nga empleado.
Kinumpirmaran ni Marbella, adda dagiti naduktalan a saan pay laeng a sumursurot kadagiti nagduduma a pagalagadan.
Karaman kadagiti nakita dagiti inspector ket ti inconsistent a panangipaay ti 13th month pay, pannaka-compute ti Overtime ken Holiday Pay, ken iti Occupational Safety and Health ket ti kaawan ti first aiders wenno safety officers.
Gapo iti daytoy, kuna na nga asistiran da dagiti establishimento tapno maikorehir daytoy nangruna ket adda pay laeng dagiti employers a saan pay unay a pamilyar kadagiti nagduduma a pagalagadan ti ahensya.
Naamoan nga umabot iti 475 nga establishment ti nainspeksyon ditoy Ilocos Norte, 609 iti Ilocos Sur, 538 idiay La Union, 280 iti western Pangasinan, 322 iti central Pangasinan, ken 282 iti eastern Pangasinan.
