LAOAG CITY – Mapilaan ti kaso a panaglabsing ti Art. 151 iti revised penal code ken Section 9 ti RA11332 wenno Non-Cooperation of the Person identified as having the notifiable diseases affected by the health in event of public concern dagiti 26 a construction workers a nasalamaan iti border checkpoint iti ili ti Badoc.
Segun ken ni PCapt. Joseph Tayaban ti Chief of Police iti ili ti Badoc, dagiti nasao a construction workers ket nakalugan iti wing van nga inturong ni Reymond Saracin y Magdasoc, agtawen ti 24, awanan asawa ken residente iti Santol, Balagtas, Bulacan.
Inbatad ni Tayaban nga apaman a pinalukatan da ti wing van ket dita a nakitada ti 24 a lallaki a nakalugan malaksid ti kaabay ti driver iti sango.
Kuna na a bayat ti panangsita da kadagiti maseknan ket awan ti ania man a dokumento a mangpaneknek ti pannakapalubos da nga agbiyahe.
Nu pay kasta, inbunannag ni Tayaban a ti laeng driver ken ti kadwa na iti sango ti lugan ti nakaipakita ti certification of employment nga inted ti CSE Builders nu sadino nga agub-ubra dagitoy.
Inpakaamo na a dagiti nasao a construction workers ket 12 dagiti naggapo iti Taytay Rizal, pito manipod iti Muntinlupa City, Tallo iti Las Piñas ken uppat iti Bulacan.
Segun pat ken ni Tayaban, dagiti maseknan ket mapan kuma iti ili ti San Nicolas babaen tapno agtrabaho iti Sta. Monica Homes, to New AFP/PNP Housing Project of National Housing Authority iti Brgy. 17 iti ili ti San Nicolas.
Mainaig iti daytoy, kuna ni Tayaban a dagus a nakikoordinar da iti Provincial Health Office para iti idadalan da ti Rapid Testing.
Innayun ni Tayaban a dimmalan pay iti medical examination iti rural health unit iti ili ti Badoc dagiti construction workers para iti pannakaisagana ti maipila a kaso kontra kadakuada.
Mainaig iti daytoy, kuna ni Tayaban a maiyur-uray ti desisyon ti gobierno probinsyal nu maisubli dagitoy iti naggapwan da a lugar wenno maipan da iti isolation facility.
