LAOAG CITY – Nadangran ti 26 nga officers kalpasan a nangiwayat ti tignay protesta ti 150 a ribu nga indibidual idiay London.
Daytoy ket inorganisar ti aktibista a ni Tommy Robinson.
Nangibato dagiti protesters ti botelya ken dadduma pay a projectiles kadagiti pulis a nangitunda ti panagsagaba ti sugat dagitoy.
Kinasarita ni tech billionaire Elon Musk dagiti protesters iti Whitehall babaen ti videolink kabayatan ti pannakipagpaset ti lima a ribu nga indibidual iti sabali a tignay protesta nga inorganisar met ti Stand Up To Racism.
Basar iti Met, adda ti 25 nga indibidual ti naarestar gapu iti panaglabsing dagitoy kadagiti pagannurotan no sadinno nga adda ti nai-deploy a maysa a ribu nga officers ken nayon a 500 manipud iti dadduma pay a forces pakairamanan ti Leicestershire, Nottinghamshire, Devon ken Cornwall.
Segun ken ni Assistant Commissioner Matt Twist a dagiti opisial ket maibilang nga awan ti pagbutbutnganda kas maysa a pulis iti baet a dakkel daytoy a pannubok kadakuada.
Kinondenar ni Home Secretary Shabana Mahmood ti panangatake ken panangdangran kadagiti police officers.
Naammoan a sumagmamano kadagiti officers ket rinautda kabayatan ti panangikagumaanda iti panagsina ti dua a grupo.
Mainaig iti daytoy, limmabes ti bilang dagiti nakipagpaset iti tignay protesta rason nga awan ti espasyo kadagiti dadduma iti Whitehall ken Parliament Square.
Kabayatanna, saan nga inkankano ti dupudop a tattao ti pakdaar dagiti otoridad ken ginandatda pay laeng a sumrek kadagiti areas ken spots a pakipagpaspasetan iti tignay protesta ti Stand Up To Racism.
