LAOAG CITY – Naarestar ti 260 a suspek iti cyber scam iti 14 a pagilian idiay Africa gapu iti sextortion ken romance scams.
Ti nasao nga operasion ket inkoordinar ti International Criminal Police Organization ken pinundoan ti United Kingdom a target dagiti criminal networks nga agus-usar kadagiti social media ken digital platforms tapno makaala ti kuarta kadagiti biktima manipud iti romance scams a maaw-awagan kas “sextortion” no sadinno a ma-blackmailed dagiti biktima babaen ti sensitibo a ladawan.
Inbatad ni Neal Jetton, International Criminal Police Organization Director ti Cybercrime, adda ti sumurok 1,400 a nabigbig a biktima manipud idiay Ghana, Kenya ken Angola.
Inlawlawagna a mapattapatta nga adda ti pakabuklan a $2.8 million ti napukaw dagiti biktima nga agduduma ti tawenda.
Kunana a kabayatan ti crackdown a naiyuswat iti nagbaetan ti Hulio ken Agosto, nabigbig dagiti pulis dagiti IP address, digital infrastructure, domains ken social media profiles a nai-link kadagiti miembro dagiti scam syndicates.
Babaen iti daytoy, naarestar dagiti suspek ken nagresulta met iti pannakakumpiskar kadagiti USB drive, sim card ken palsipikado a dokumento pakairamanan ti pannakaikkat ti 81 a cyber-crime groups iti intero nga Africa.
Mainaig iti daytoy, inpakaammona a ti panagdur-as dagiti online a platforms ket nanglukat kadagiti baro nga oportunidad para iti criminal networks a manggundaway kadagiti biktima a pakaigapuan ti agpada a financial loss ken psychological harm.
Naammoan nga adda ti 68 a suspek ti naarestar idiay Ghana no sadinno a nakumpiskar dagiti otoridad ti 835 a devices ken nabigbig dagiti 108 a biktima kabayatan ti operasion.
Narekobre dagiti otoridad ti $70,000 manipud iti mapattapatta a $450,000 iti pinansial a mapukpukaw.
Kabayatanna, dagiti dadduma pay a pagilian a karaman iti operasion babaen ti African Joint Operation kontra iti Cyber-crime project ket iti Benin, Burkina Faso, The Gambia, Guinea, Kenya, Nigeria, Rwanda, South Africa, Uganda ken Zambia.
