LAOAG CITY – Umabot ti 27 a pamilya dagiti naapektaran iti pannakatay dagiti ado a taraken a tilapiya iti Barangay Gabu Sur ditoy ciudad ti Laoag.
Inbatad ni Barangay Chairman Gil Ramos iti nadakamat a barangay a nakaad-ado dagiti nagpisti a tilapia kalpasan a nagtipon ti apgad ken tamnay a danom.
Segun kenkuana, karaman kadagiti kangrunaan a naapektaran ket ti baro na.
Inlawlawag ni Ramos a kadagiti naglabas nga aldaw ket saggabassit laeng dagiti tilapia a natnatay ngem kadaytoy ket naggigiddan dagiti ado a tilapia a natay.
Kuna ti kapitan a maladingitan da unay iti napasamak kangrunaan na ket kaadoan kadagiti agtartaraken ti tilapia iti barangay da ket ut-utangen da laeng dagiti puunan ken ipakpakan da.
Innayon ni Ramos a gapu iti napasamak ket napilitan da payen a nangkalap kadagiti nabatbati a taraken da a tilapia uray babassit dagitoy tapno saan da a mairaman a matay.
