LAOAG CITY – Umabot iti 27 a tattao dagiti natay kalpasan a nauram ti maysa a kadsaaran ti commercial building idiay Osaka City, Japan.
Segun iti Osaka fire department, agpapada a nagsagaba iti cardiopulumnary arrest dagiti natay gapu iti pannakapupok da iti uram.
Kadagiti rimuar a video footage iti nasao a uram, nagrurob ti apoy iti maikapat a kadsaaran ti pasdek nu sadino a ngimissit dagiti sarming a tawa.
Dinosdosena a bombero dagiti nagresponde ken umabot ii 30 a minutos ti napalabas sakbay a naideklara ti fire out.
Iti agdama ket agtultuloy ti imbestigasyon dagiti otoridad iti posible a namunganayan ti uram.
Naamoan a ti kadsaaran ti pasdek a nauram ket maysa a clinic a mangipapaay ti mental health services ken general medical care.
Itay napan a tawen, nairekord ti Japan ti kakaroan nga insidente ti uram kalpasan a natay ti 36 a tattao iti pananguram ti maysa a lalaki iti film studio a nakaiyestablisar iti Kyoto.
