LAOAG CITY – Inpakaammo ni Mrs. Valerie Talamayan, Officer In Charge Information Officer ti Department of Education Schools Division of Ilocos Norte nga adda ti 28 a pagadalan ditoy probinsia ti posible a mapili a pakaiyuswatan ti limited face to face classes.
Segun kenkuana, pakairamanan ditoy ti Canaam ES, Danao ES, Gubang ES, Masadsaduel ES, Dasar ES, Isic-Isic ES, Saricao ES, Tungel ES iti ili ti Vintar.
Virbira-Angset ES ken Carasi NHS iti ili ti Carasi.
Adams ES ken Adams NHS iti ili ti Adams.
Bicbica ES, Buanga ES, Godogod ES iti ili ti Pinili.
Alao-ao ES ken Paddagan ES iti ili ti Bangui.
San Isidro ES, Dumalneg ES, ken Dumalneg NHS iti ili ti Dumalneg.
Agaga ES iti ili ti Burgos.
Barangobong ES, Nueva Era NHS, Adriano P. Arzadon NHS ken Uguis Integrated School iti ili ti Nueva Era.
Cacafean ES iti ili ti Marcos.
Pangil ES ken Tadao ES iti ili ti Pasuquin.
Inbatadna a nagbalin a naiget ti panangarisitda kadagiti nasao a pagadalan gapu ta nangisayangkatda pay ti feasibility study ken survey kadagiti stakeholders a pakairamanan dagiti nagannak, mangisursuro, dagiti tao iti komunidad ken ti maseknan a Local Government Unit wenno LGU.
Kunana a manipod iti 35 a pagadalan ditoy probinsia a naipasa ket 28 laeng ti pinili ti Central Office a mabalin a mairaman iti limited face to face classes.
Inlawlawagna a napili dagiti 28 a pagadalan gapu ta dagitoy ti maibilang a kababaan wenno awan ti kasoda ti COVID-19 idi naisayangkat ti nasao a survey.
Inbunannagna nga umabot iti 638 a pagadalan iti intero a pagilian ti nakapasa iti initial assessment ti DepEd no sadinno a ti 28 ket manipod ditoy probinsia.
Inbagana a dagiti 28 a pagadalan ket dagitoy ti rumbeng nga agisubmitir ti School Safety Assessment Tool kas no kasano ti kasagana ti school facilities, alternative work arrangements kadagiti mangisursuro ken no mano ti limitado a bilang dagiti estudiante iti uneg ti maysa a classroom.
Mainaig iti daytoy, kuna ni Mrs. Talamayan a manipod iti 638 a pagadalan iti intero a pagilian ket 100 laeng ti pilien ti DepEd Central Office nga Elementary School pakairamanan ti Kindergarten agingga Grade 3 idinto a 20 laeng ti mapili a Secondary School pakairamanan ti Senior High School wenno dagiti Grade 11 ken Grade 12 nga adda iti Technical Vocational Livelihood wenno TVL Strand gapu ta kasapulanda ti practical application ken technical education livelihood.
Innayon ni Mrs. Talamayan nga awan met pay ti specific guidelines ti pilot face to face classes gapu ta ti resulta ti School Safety Assessment Tool ti pangibasaranda para iti policy guidelines para iti implementasyon ti pilot face to face classes.
