LAOAG CITY – Dumanon iti 29 a bags ti dara ti naukkon iti naisayangkat a Blood Letting Activity iti lokal a gobierno iti ili ti Pinili.
Segun ken ni Ms. Lized Fernandez, maysa kadagiti agserserbi iti Philippine Red Cross – Ilocos Norte Chapter, kabinnuligda ti Rural Health Unit iti ili ti Pinili iti balligi a pannakaisayangkat iti nasao nga aktibidad.
Inbatadna a dagiti mismo empleado iti ili ti Pinili, barangay officials, private citizens ti nakipaset iti aktibidad.
Mainaig iti daytoy, inpadanon ti Local Chief Executive iti ili ti Pinili ti panagyamanna kadagiti umili a nakidanggay iti Blood Letting Activity.
Babaen iti daytoy, sigurado nga adu manen a biag ti maisalbar babaen kadagiti naidonar a dara.
Kabayatanna, magutgutigot dagiti umili a suportaran kadagiti kapada nga aktibidad gapu ta saan laeng nga agbalin a nasalun-at ti bagina no di ket makaisalakanda pay ti biag ti maysa a tao.
