LAOAG CITY – Umabot iti 29 a personnel ti Philippine National Police ti maiwaras kadagiti tallo a kamposanto iti ili ti Sarrat.
Daytoy ti inpakaammo ni Police Capt. Kester Arellano, ti chief of police iti nasao nga ili.
Inbatad ni Arellano a naan-anayen a nakasagana da para iti panangipaay da ti seguridad kadagiti residente a mapan bumisita iti tanem dagiti pimmusayen a kapamilya ken kakabagyan da.
Innayon na a tapno masigurado nga awan dagiti makailibas a makaiserrek kadagiti ipawpawil da a maiserrek iti uneg ti kamposanto ket maysa laeng ti entry point ken exit point iti tallo a kamposanto iti ili ti Sarrat.
Mangnamnama ni Arellano nga awan dagiti saan a nasayaat a mapasamak kabayatan ti Undas iti nasao nga ili.
